მე მინდა, ჩემი ქმარი „ჩვარი“ იყოს!!!

ჩვენს ლამაზ დედაქალაქში ერთი საინტერესო ტენდენცია შევნიშნე: ცოლიანი კაცის სექსი სხვა ქალთან თურმე, ღალატი არ ყოფილა, ეს სრულიად ჩვეულებრივი რამაა და შეგუებული უნდა ვიყო, რომ თუკი ერთ დღესაც გავთხოვდები ჩემი ქმარი აუცილებლად მიღალატებს. სხვა შემთხვევაში, როგორც ერთმა ბიჭმა „ამიხსნა“: „კაცი კი არა ჩვარი იქნება“.  ბევრი ვიფიქრე და იმ დასკვნამდე მივედი, რომ თუკი კაცობა ცოლის ღალატით განისაზღვრება, მინდა, რომ  ჩემი მომავალი ქმარი „ჩვარი“ იყოს!!!

ქორწინების შემდეგ, რაღაც გაუგებარი მიზეზების გამო, ქმრები უფლებას აძლევენ საკუთარ თავს სხვა ქალებთან იარონ ერთი „ღამით“ და ამას სულაც არ ეძახიან ღალატს. ერთმა ჩემმა ცოლიანმა ნაცნობმა საინტერესო არგუმენტი მომიყვანა, იმის დასამტკიცებლად თუ რატომ არ არის ეს ღალატი: კაცებს არ გვამახსოვრდება ის ქალები, რომლებთანაც ცოლის გარდა ვერთობითო. შენ კი რომ გათხოვდე და მსგავსი რამ გააკეთო, აუცილებლად დაგამახსოვრდებაო.“ საინტერესო მოსაზრებაა, მაგრამ, მეც რომ იმავე ინტენსივობით ვუღალატო ქმარს, როგორც ჩემი მეგობარი ღალატობს თავის მეუღლეს, ალბათ მეც ამერევა სათვალავი. „იმიტომ რომ კაცი ვარო და ძმაკაცებს ხომ არ დავკარგავ ცოლის გამოო..“ –  ძმაკაციც ესეთი უნდა თუ ცოლს არ უღალატე რომ დაიკარგება. საკუთარ უნებისყოფობას რაღაც სიტუაციურ ფაქტორებს მიაწერენ და ამით სრულიად ჩვეულებრივს და მისაღებს ხდიან ქორწინების მერე სხვა ქალებთან ურთიერთობას.

„ საყვარელი ხომ არ მყავსო“– მითხრა კიდევ ერთმა „მოღალატე“ ქმარმა.(როგორც ირკვევა, ერთ ქალთან უფლება გაქვს მხოლოდ ერთხელ გქონდეს სექსი თუ გინდა, რომ ეს ღალატად არ ჩაითვალოს). გეთანხმებით, სხვადასხვაა ერთი ღამის ურთიერთობა და სისტემატიური საყვარელი. ამ უკანასკნელს კაცი მაშინ იჩენს, როცა ცოლ–ქმრულ ურთიერთობაში რაღაც სერიოზული პრობლემაა და მე ვფიქრობ, რომ ეს ნამდვილად ცოლის ბრალია. გამოსავალი ამ დროს ისაა, რომ დაშორდე და თავს მიხედო. მაგრამ, როცა ერთი ღამით აქვს ურთიერთობა და შენ მაინც ყველაზე მეტად უყვარხარ ეს უფრო საშინელებაა არაა? გაგლეჯილი მთვრალი ვიღაცასთან წვება, ეფერება, კოცნის, არც კი იცის ნორმალურად ვინაა და მერე ისევ შენთან მოდის. და რაც ყეველაზე მთავარია ეს ჩვეულებრივი რამააო ფიქრობს.

მაგრამ კიდევ ერთი მნიშვნელოვანი დეტალია აქ გასათვალისწინებელი, თუ ეს ყველაფერი ასეთი მისაღები და ჩვეულებრივია, მაშინ რატომ არ მიდიან ცოლთან და რატომ არ ეუბნებიან დღეს სხვა ქალთან გავერთეო. ესეიგი რაღაც ისეთი ჩაიდინეს, რაც ცოლს ძალიან ატკენს გულს. და ნუთუ ამას იმიტომ აკეთებენ „ძმაკაცები არ დამშორდნენო?“ – და კიდევ, მოდი ყველაფერს მეგობრებს ნუ დავაბრალებთ და შევთანხმდეთ, რომ ხანდახან ეს სულაც არ ხდება სიტუაციის და ძმაკაცების გართობის გამო.

რას ვიზამთ, ადრე იქმნება ოჯახები ჩვენს ქალქში და ჯერ არ გვაქვს დაკმაყოფილებული გართობის მოთხოვნილება..  სექსი ყველას უნდა, მაგრამ ვერ ბედავენ თავის ერთადერთ სიყვარულს „შეჰკადრონ“ ქორწინებამდე, იმიტომ, რომ ერთადერთი „პრასვეტი“ საქართველოში სარფიანი გათხოვებაა და იმიტომ, რომ მამიკო, ალბათ, გაგიჟდება რომ გამოაცხადო სახლში, მე ჩემს შეყვარებულთან გადავდივარ საცხოვრებლადო.